Har ek ruuh men ek gham chhupaa lage hai mujhe
ye zindagi to ko'ii bad-duaa lage hai mujhe
jo aaNsuoN meN kabhii raat bhiig jaatii hai
boh't qariib vo aavaaz-e-paa lage hai mujhe
maiN so bhii jaauuN to kyaa merii band aaNkhoN meN
tamaam raat ko'ii jhaaNktaa lage hai mujhe
maiN jab bhii uske khayaaloN meN kho saa jaataa huuN
vo Khud bhii baat kare to buraa lage hai mujhe
dabaa ke aaii hai siine meN kaun sii aaheN
kuchh aaj rang teraa saaNvlaa lage hai mujhe
na jaane vaqt kii raftaar kyaa dikhaatii hai
kabhii kabhii to baRaa Khauf saa lage hai mujhe
bikhar gayaa hai kuchh is taraH aadmii kaa vujod
har ek fard ko'ii saaneha lage hai mujhe
ab ek aadh qadam ka hisaab kyaa rakhiye
abhii talak to vahii faaslaa lage hai mujhe
hikaayat-e-gham-e-dil kuchh kashish to rakhti hai
zamaana Ghaur se suntaa huaa lage hai mujhe.
No comments:
Post a Comment