Roshan Woh Mera Gosha-e-Tanhai To Kar Jaye, Qateel Shifai, Urdu Best Poetry, Urdu Ghazal, Urdu Poetry, Urdu Ghazal,

Roshan Woh Mera Gosha-e-Tanhai To Kar Jaye
Yaadoun Main Sahi,Anjuman Aarai To Kar Jaye

Yeh Meri Zamanat Hay Kah Paaye Ga Woh Shuhrat
Thori Si Woh Pehlay Meri ruswai To Kar Jaye

Kar Doun Main Usay Aqal K Mafhoom Say Waaqif
Kuch Din K Liye woh Mujhay Sodaai To Kar Jaye

Sab Kehtay Rahain Main Usay Qaatil Nah Kahun Ga
Lakin Woh Koi Kaar-e-Maseehai To Kar Jaye

Main Daikh Sakun Chehroun K Peechay Bhi Hay Kya Kuch
Itni C Ata Woh Mujhay Baynaai Kar Jaye

Main Kar to Sakun Jurm-e-Muhabbat Ki Wazahat
Phir Jo Woh Saza Day, Meri Shanwaai To Kar Jaaye

Hay Farz Qateel Us Pah Mera Jaan Chirakna
Par Woh Meri Kuch Hosla Afzaai To Kar Jaye.