Jis ko aksar socha tha tanhaai mein

Jis ko aksar socha tha tanhaai mein
shamil hai woh shakhs meri ruswaai mein

Mujh say mat poocho woh chehra kaisa tha
doob gaya main aankhon ki gehraai mein

Jagtay rehnay ki kitni targhiben thin
us ki bojhal thaki hoi angrdaai mein

Piyar bhi karta hay woh be parwaai say
nadani ka rang bhi hay danaai mein

Woh ek pal ko rootha to mehsoos hoa
jaisay beet gaya ek saal judaai mein

Jao apnay jaisay log talash karo
kia pao gay Mohsin say harjaai mein .